انا جاي

انا جاي طيب وجاي منين ورايح فين؟ علي الرغم من ان الكل بيروح وبيجي بغض النظر عن الاماكن بس مجيتي انا مختلفه شويه.ده الي يخلي السؤالين دول اسئله مصيريه فحياتي بسبب بعد المكان الي انا جاي منه وياتري انا هااقدر اوصل للمكان الي انا رايح له ولا لا. انا جاي من (الصعيد الجواني) علي فكره الصعيد الجواني ده كوكب تاني بيمتاز بصفات مايعلم بيها الا ربنا ويتميز الغلاف الجوي بتاعه باحتوائه علي اليئس والاحباط والملل والفشل , تتميز مياهه بان لها لون وطعم ورائحه وطبعا حضارتكم عارفين هي ريحة ايه يتميز مجتمعه بفجوه عظيمه بين شريحتين من الناس شريحه جاهله ومتخلفه ومتحجرة التفكير علي الرغم من انهم واخدين الشهاده الكبيره وطبعا معزورين وشريحه قليله من الناس الي بتفهم وطبعا دول ربنا يلطف بيهم لانهم غير انهم تعبانين فالبيئه دي لا ده دول كمان مجانين وخيالهم واسع وبيضحك عليهم من الناس التانين الي اتكلمنا عنهم طبعا الي بتجيله الفرصه ويهج من المكان ده زي الي كان محكوم عليه بالاعدام وجه محامي زي حسن سبانخ جابله البرائه انا بقي عشت ودرست واتعلمت وكبرت وترعرت فهذا المكان العظيم وعلي فكره المكان ده انجب للبد الكثير من العظماء بس ولا واحد فيهم كان عايش فيه انا بقي وانا فسنه رابعه ابتدائي اكتشفت ان انا بحب الورقه والقلم بس ازاي دا هم دول سبب تعاستي فالفتره دي لو ماعملتش الواجب بضرب وهم السبب لو مطلعتش الاول بضرب وهم السبب طبعا الواجب كان بيبقي كتير اوي لدرجة اني حسيت ان المدرسه بتدينا واجب كتيييير مش علشان نستفيد علشان ايدينا توجعنا ومنقدرش نكمله ونيجي صباح اليوم الدراسي الجديد وتضربنا ياجماعه الكلام ده كان بيحصل فمدرسه خاصه للغات تخيلو المدارس الحكومي كان بيجري فيها ايه نرجع للموضوع من فضلكم قوم انا بقي اتاريني بعرف اكتب كانت الانتفاضه الفلسطينيه فالوقت ده هي كل شغلي الشاغل وكنت فاكر اني اقدر احررها بمقالاتي وابتديت اوزع المقالات دي فالمدرسه علي انها منشورات واعمل مظاهرات وكانت ليله راح الناظر جه وقالي تروح دلوقت وتجيبلي ولي امرك معاك روحت جيبت الحاج فالناظر حكاله وكانت النتيجه ان المدرسه كلها اتفرجت عليا وانا بضرب من الحاج لاني مش مهتم بدراستي ومهتم بالكلام الفاضي ده روحت متجه ع الشعر كتبت قصيده فالوقت ده اسمها ياقدس ياحبيبة السماء بتقول ياقدس ياحبيبة السماء يامدينة الفداء والشهداء ياقدس يامهد للانبياء يامدينة الايباء والولاء ياقدس يامقبرة للابرياء السنتنا لن تكف عن الدعاء من اجليكي ياحبيبة السماء وكان كل الي يقراها يقولي سارقها من مين وهو ده كل الي اهتمو بيه بصراحه ومش شافو ان فيه طفل موهوب لو اهتمينا بيه هايكون حاجه حلوه والله ماساه ياجماعه فضلت اكتب مع نفسي ولنفسي وكان الحاج يدخل الاوضه لو لقي حاجه زي دي تبقي ليله سودا وكانت بتتقطع علشان انا المفروض مش اعمل حاجه غير المذاكره لحد ماكرهت المذاكره ودي نقطه مهمه اوي فتربيتي اثرت تاثير سلبي فحياتي ماعلينا جيت ف2 اعدادي وفرجتهم لمدرس اللغه العربيه الي حسيت انه بيفهم شويه قالي ياابني انت لسه بدري عليك اوي فين القافيه وفين بحور الشعر وفين وفين كلام كبير اوي عليا انا مش ااعرف منه حاجه ماعلينا قلت لنفسي ماتنفض للشعر يامعلم واكتب اغاني لاحد هايقولك قافيه ولا وزن ولا بحر ولا نهر وكتبت اغاني وغلطت غلطه مره وكتبت قصه كانت نكته مدرسين اللغه العربيه فالمدرسه الاعدادي بتاعتي لمدة ترم كامل من الدراسه برضه مايئستش ابتديت من اول اولي سنوي اكتب اغاني حسيت انها كويسه واحسن كتير من كلام اوي بيتقال كتبت مجموعه مش بطاله وفثانوي اكتشف استاذ عبد الحافظ بخيت مدرس اول لغه عربيه بالمدرسه ومشرف النشاط المسرحي ان انا امتلك موهبه تمثيليه عبقريه وعملنا مسرحيه ونجحت واخدت مركز اول علي مستوي الاداره التعليميه بحالها وتقريبا احنا مكانش لينا منافسين استاذي العزيز حسسني ان انا وقفت فبير سلم الشهره والمجد عشمني بالحلق خرمت انا وداني وانتو عارفين الباقي, ده باختصار اجابة السؤال الاول انا جاي منين . اجابة السؤال التاني بقي انا رايح فين مختصره شويه لاني لسه ماروحتش. انا عايز اروح المكان الي الموهوب فيه بيلاقي نفسها اروح لحد يقدرني يهتم بيا يحسسني ان فيه امل انا عارف اني بذره محتاجه تتزرع فتربه خصبه وتتسقي وتتعرض لضوء الشمس علشان تطرح , انا بقي عايز اروح للمهندس الزراعي الي عارف الكلام ده زيي علشان انا بجد نفسي اطرح , نفسي اكون حد ناجح فحياته نفسي افكاري توصل للناس او للشباب تحديدا لان انا صعبان عليا حالنا احنا الشباب بس فعلا غصب عننا الظروف بتعجز اي حركه وتهمد اي نشاط واي حد بيتحداها بتكسره وقليلين اوي الي عودهم ناشف ويقدرو يستحملو انا بقي نفسي بجد الشباب كلها يبقي عودها ناشف ولا انتو ليكم راي تاني؟.